Вангел Спироски

Никогаш не премолчувајте ако сте оштетени во остварувањето на своите права

Професионално ис­куство: Ап­сол­вент на ФТУ - Ох­рид, комер­ција­лист во “АМАК СП” А.Д. - Охрид.

Ангажирање во граѓан­ски­от сек­тор: Ак­тивно анга­жиран во афир­мирањето на прав­ната регулатива за заш­тита на гра­ѓаните како потрошувачи, еден од иницијаторите за отворање на Советодавното биро на Орга­низацијата на потрошувачите на Маке­донија во Охрид во 2001 година. Моментално координатор на Советодавното биро.

Хоби и интереси: Стрелаштво - активно се занимавам со спортско стрелање со мало­калибарска пушка, боречки вештини - карате, аикидо.

Најтешка одлука: Јас не сум од онаа категорија луѓе кои брзо донесуваат каква било одлука, а потоа се доведуваат во состојба брзо да го менат мислењето. Се водам, едноставно, според она народното “два пати мери еднаш сечи”. Затоа и не се доведувам во онаа исконска дилема “Ако одлучиш вака, ќе се каеш, а ако одлучиш поинаку, повторно ќе се каеш”.

Амбиции: Моите амбиции се насочени кон стручно усовршување и примена во мојата работа на моделите и методите кои ги познава совре­мениот свет, а кои за жал, кај нас, ние младите ги осознаваме тогаш кога истите тие ќе излезат од “мода”.

Во слободно време чита: Претежно во слободно време читам белетристика од мојот стручен ангажман, економска литература, фељтони и мемоарска литература.

Каде оди во слободно време:  Слободното време - кога не го користам за читање и спортување, го посветувам за средби со пријателите, кино-проекции, а бидејќи во Охрид забавниот живот е поинтензивен во летниот период - особено внимание посве­тувам на фестивалските приредби на “Охрид­ско лето”.

За време на викенди: Дел од викендите сакам да ги користам за препуштање на себеси. Одам во разгледување на пошироката околина на Охрид или Струга, додека во зимскиот период го посетувам ски-центарот во Маврово.

Кој национален/локален проблем го смета за особено важен и зошто: Од националните проблеми кои за жал ги имаме многу, приоритетот за мене се: разрешување на проблемот со името, оддалеченоста од т.н. шенген-зона, односно затвореноста на границите и неприфатливиот визен режим, нефункционирањето на правната држава, пропаѓањето на некои мерки за зажи­вување на стопанството, неконзистентната еко­номска политика којашто треба да обезбеди развој на државата, големата невработеност и сиро­маштијата. Сметам дека со решавање на економ­ските состојби ќе се создаде амбиент за разре­шување и на другите прашања.

Кој глобален проблем го смета за особено важен и зошто: Непочитувањето на чове­ковите права, воените закани и воените судири, тероризмот, трговијата со луѓе и ширењето на наркоманијата. Сите овие проблеми се опасност за развој на циви­лизацијата и од своја страна значат вис­тинска кочница за рамномерен развој на сите земји и народи.

Што би променил во Македонија и во светот: Кога би бил во можност, би насто­јувал во нашата земја да ја зајакнам само­довербата кај нашите луѓе. Сметам дека неправилно, заради многу неповолности, често пати се потценуваме и себеси како граѓани, а и нашата земја како држава.
Во светот би сакал да можам да ја променам се уште присутната одвоеност, недовербата и да го надминам расчекорот меѓу крајно сиромашните и крајно богатите земји.

Совет/порака: Во одговор на ова прашање би се послужил со мотото на  асоцијацијата ОПМ во која посебно сум ангажиран во слободно време: “Никогаш не премолчувајте ако сте оштетени во остварувањето на своите права”. Тие права ви се дадени вам затоа што се универзални и треба да уживате во нив, без оглед дали се: во доменот на купо­продажните односи и услугите и со еден збор потрошувачки права или како права кои ви припаѓаат како на индивидуа.

Никогаш не би можел да: Нанесам штета или зло на недолжни и на луѓе кои не заслужуваат да им се возврати со такво нешто. Впрочем, јас и не можам да мислам лошо за некого. Таков сум!