KVINNA TILL KVINNA

Мултиетничка соработка на жените

По косовската криза, во 1999 година, шведската фондација Kvinna Till Kvinna почна да работи во Македонија.

Поточно, како што ни рече г. Боријана Јонсон, координатор на канцеларијата, Kvinna Till Kvinna беше „евакуирана” во Македонија од Косово и во тој период работеше со бегалците. Но, беше увидено дека постои голема потреба од функционирањето на оваа фондација и во Македонија, така што таа продолжи да работи во нашата држава.

Kvinna Till Kvinna (на шведски, тоа значи жене за жена), работи пред си со женските здруженија на граѓани. Остварена е соработка со Лигата на албанската жена од Тетово, здружението „Есма”, PHURD од Делчево, Ауреола од Струга, Организацијата на жените од Свети Николе и други.

- Во моментов, сметам дека во Македонија најголем приоритет во оваа област е остварувањето на соработката меѓу различните етноси врз основа на остварување на женските права. За жал, македонските женски организации се етнички организирани. Многу од нив работат на родовите односи, но малку знаат што навистина опфаќа овој поим. Мислам и дека структурата на женските организации е многу архаична, не е во тек со времето и со потребите на жената. Структурирањето во големи сојузи не дава многу простор за самата жена, за нејзино препознавање – вели г-ѓа Јонсон.

Kvinna Till Kvinna во моментов поддржува една група македонски лидери на женски здруженија. Групата се вика Антико и во неа се вклучени лидерки-фацилитаторки кои делуваат на мултиетничко ниво, на подигање на свеста на жената, на подобрување на организациските способности и на делувањето во локалните заедници.

Пред се, за Kvinna Till Kvinna од важност е работата на проекти кои вклучуваат жени Македонки, Албанки, Ромки, Турчинки, Србинки и други етноси, кои работат не одделно, како групи секоја за себе, туку заедно, за решавање на заедничките проблеми на жената како мајка, носител на домот, вработена, ангажирана во политиката област или во други области.

Се поддржуваат проекти со цел зголемување на овластувањата на жените и зголемување на нивното активно учество во општеството, програми за обука, поттикнување за создавање мрежи за соработка, а проектите кои се спроведуваат треба да се во согласност со локалните потреби.