„Шелтер центар – прифатилиште за жени и деца - жртви на насилство“

Започна со реализација Женскиот економски развоен програм

„Шелтер центарот – прифатилиште за жени и деца жртви на насилство“ отпочна со реализација на првиот дел од проектот „Женски економски развоен програм“, со чии што  активности треба да бидат опфатени жените - жртви на насилство, жените со низок социјален статус, како и  самохраните мајки и жените и девојките од руралните средини. Проектот треба да овозможи економско јакнење на споменатите групи жени, со обезбедување на услови за бесплатна едукација и обука за работа со конфекциски машини.  

„Женскиот  економски развоен програм“ е поддржан од Амбасада на Република Германија, Хуманитарна единица за помош, Градското собрание на Нинберг, Германија, и  Македонската развојна фондација за претпријатија.                       

Д.М.

Форум на албанската жена од Тетово и ЕСЕ

Бесплатни правни услуги за жените

Тетовскиот Форум на албанската жена, во соработка со Организацијата за еманципација, солидарност и еднаквост (ЕСЕ) со седиште во Скопје, наскоро во Тетово ќе отвори Центар за правна помош кој на жените ќе им нуди бесплатни услуги. Центарот ќе работи првенствено на подигање на свеста на општеството за правата и обврските на жената во него.

Жените од Тетово во иднина во Центарот ќе можат да добиваат правна помош во решавање на семејни проблеми од различен вид: разводи, семејно насилство, поделба на семеен имот, да бидат бесплатно советувани при решавање на одредени социјални проблеми и др.

Во Центарот за правна помош е предвидено да работат еден адвокат и еден социјален работник.  

Г.Ш.