НАЦИОНАЛНА КОНФЕРЕНЦИЈА
Отворена власт преку децентрализацијата
На 25-ти и 26-ти март годинава, во Скопје, беше одржана Националната конференција под наслов “Градење отворена власт преку децентрализација”, чија цел беше да го поттикне процесот на градење отворена власт во Македонија, преку пренесување на надлежностите од централната на локалната власт, како и да го поттикне дијалогот помеѓу власта и граѓанското општество во Македонија за тоа како да се изгради отворена власт преку зголемена информираност, консултации и јавно учество. Конференцијата ја организираа Министерството за локална самоуправа и Фондацијата Институт отворено општество Македонија. Финансиската поддршка ја обезбедија Светска банка, ФИООМ и Проектот за реформи во локалната самоуправа на УСАИД. Во рамките на конференцијата се одржат три тркалезни маси на следните теми: “Законодавната рамка за граѓанското учество, пристапот до информациите и административните документи”; “Системи и методи за обезбедување на правата на граѓаните и граѓанското учество” и ”Како општествениот дијалог и транспарентноста можат да ја зајакнат продуктивноста и локалниот развој?”, како и неколку панел дискусии, на темите: “Гледиштата за граѓанско општество, општествениот дијалог и децентрализацијата”; “ИЦТ, транспарентност и локалната самоуправа” и “Децентрализацијата, општествен дијалог и транспарентност: Имплементација на локалната самоуправа во Македонија”, проследени со примери од практиката на нашата држава. На конференцијата учествуваа повеќе експерти, универзитетски професори, претставници на државните органи на Република Македонија, на невладините организации, на Делегацијата на Европската комисија во нашата држава, Светската банка, УСАИД и други. М.И.
|