Четврта министерска конференција за здравје и животна средина 

Децата најголеми жртви на загадувањето на животната средина

Децата под пет години се само 10% од свет­ската популација, но и 40% од вкупниот број жртви од загадувањето на животната средина, предупредува Свет­ската здравствена организација (СЗО) во својот најнов извештај, по обе­лоденување на податокот де­ка над 100.000 деца во Европа го­дишно умираат поради загаденост на воздухот и водата, но и поради повреди.  СЗО  во јуни организира министерска конференција за здравје и животна средина во Будимпешта, на која учествуваа министри од 50 европски држави, под мотото “За подобра иднина на нашите деца”. Инаку, според извештајот на Светската здравствена организација, Македонија не е ниту во најзагрозените, но не е ниту во редот на најбезбедните земји кога станува збор за загаденоста на животната средина и последиците од еколошките катастрофи.

Паралелно со министерската конферен­ција, невладините организации од по­веќе европски држави одржаа “Пла­не­тарен форум за здравје” на кој со  многубројни трибини што се однесуваа на загадувањето на водата и возду­хот, недозволените хемикалии во коз­метичките производи и социјалните услови во коишто растат најмладите. Граѓанскиот сектор  уште еднаш ги предупреди владите на европските зем­ји дека не е доволно само декларативно изјаснување за подобрување на жи­­вот­­ната средина, туку и преземање конкретни чекори. Министрите ја пот­пи­шаа Декларацијата и Акцискиот план за детско здравје и заштита на животна средина во Европа, со што се обврзуваат до 2007 година да ги изработат националните акциски планови за здравје и екологија. Македонската делегација ја предводеше министерот за животна средина и просторно планирање, Љубомир Јанев.

Во рамките на конференцијата, СЗО го промовира и првиот атлас за влијанието на животната средина на здравјето на децата. Поразителен е фактот дека во третиот милениум речиси 2,4 милијарди луѓе во светот немаат пристап до чиста вода, а недозволеното присуство на оловото во средината која не оп­кружува предизвикува тешки последици по менталниот и физичкиот развој на најмладите. Поради живеење во несоодветни хигиенски услови, многу деца низ светот умираат од маларија и стомачни инфекции. Нере­шените економски прашања во многу држави при­донесоа во нај­сиромашните земји децата да бидат евтина работна сила, без право да се образуваат и да израснат во здрави луѓе.     

                                       М.К.