Десет години постоење на Фондацијата “Клементина Рафајловска”
Исклучителна поддршка на младите музички таленти
На 26 мај, во Домот на Армијата во Скопје, Фондацијата “Клементина Рафајловска” ја одбележа 10-годишнината од своето формирање.
Станува збор за единствена фондација која ги поддржува младите таленти од инструменталниот оддел при Музичко-балетскиот центар “Илија Николовски-Луј”, како и младите музичари од земјава. На споменатиот концерт беше доделена и годинешната награда “Клементина Рафајловска” на младиот Зоран Кирјаковски за најдобар инструменталист матурант на МБУЦ, а настапија и дел од досегашните десет добитници на наградата: Огненка Герасимовска, Александар Краповски и Симон Трпчевски.
Основана во спомен на прерано починатата харфистка, Клементина Рафајловска, Фондацијата, со еднократни стипендии ја поддржува и меѓународната афирмација на младите, овозможувајќи им учество на меѓународни семинари и натпревари, го поттикнува уметничкиот развој на учениците, организира стручни собири за размена на знаења, ја поддржува и концертната дејност во земјава и во странство, како и изработката на аудио-визуелни проекти.
Успесите на младите музичари се одбележуваат со доделување плакети, а досега се доделени и десетина еднократи парични стипендии на најуспешните учесници на 39-тиот државен натпревар на музичките училишта на Република Македонија. Со финансиска помош на Фондацијата, целосно е финансирана изработката на прв, од ваков вид, компакт-диск од истиот натпревар.
Во досега реализираните активности се забележани и телевизискиот пренос на МРТВ на концертот на оркестарот Московија на Охридско лето во 1998 година, концертот на добитниците на наградата Скопско лето, успешната соработка со фондации од странство, но и со државни, стручни, научни и општествени органи и организации заради обезбедување материјално-финансиска и др. поддршка на учениците, ансамблите, класите, групите и други сродни институции од земјава.
Годинешните активности на Фондацијата “Клементина Рафајловска” се насочени кон изработка на ЦД-изданија и отворање сопствен веб-сајт за поголема афирмација на младите музичари. Заедно со Музичката младина на Македонија, Фондацијата ќе го организира и одржувањето на Меѓународниот натпревар “Музичари на новиот милениум” кој треба да се одржи во Скопје.
К.Б.
|