СПЕЦИЈАЛНА ОЛИМПИЈАДА

Да победам, или да бидам храбар обидувајќи се

На 17 декември минатата година, во Скопје се одржа основачкото собрание на Спе­цијалната олимпијада, која сега веќе е регистрирана како здружение на граѓани. Ова здружение е основано од група ентузијасти, кои имаат за цел да помогнат во ин­те­грацијата на лицата со интелектуална по­преченост во општествениот живот. Својата цел тие ќе се трудат да ја постигнат преку спортско ангажирање на овие лица.

- Мисијата на Специјалната олимпијада е да се обезбедат услови за интеграција и ресо­цијализација на лицата со ментален хен­дикеп. Специјалната олимпијада претставува фондација, иницирана од познатото амери­канско семејство Кенеди. Ја креира Џозеф Кенеди, по инспирацијата на Јунис Кенеди. Во светот тоа е мошне респектирана ин­ституција, поддржана и промовирана од многу јавни личности. Големите ѕвезди, како Стинг, Џон Бон Џови и други, за Божиќ подготвуваат ЦД чиј приход се донира во оваа фондација. Нешто слично се обидуваме да направиме и тука - наш член е г. Иво Јанковски од продукцијата „Трето уво“ кој прави обиди да ја реализира оваа идеја, а разговаравме и со Авалон продукција, која ни даде поддршка. Се надеваме дека ќе имаме вакво ЦД напролет. Имаме поддршка и од бизнис-секторот: од Сискон, а пре­говараме и со Телеком, Мобимак, Кометал, Скопската пиварница. МТВ и А1 ни дадоа целосна медиумска поддршка. Исто така, имаме голема поддршка од претседателот на Македонија, г. Борис Трајковски и г-ѓа Флорија Љатифи од неговиот Кабинет, а се обративме и до Министерството за млади и спорт. Соработуваме и со Светската банка, УСАИД, ФИООМ и други домашни орга­низации, меѓу кои и здружението “Порака”, вели г. Огнен Стаматоски, директор на Специјалната олимпијада - Македонија.


„Да победам. Но доколку не можам, да бидам храбар во обидот.“
Мотото на Специјалната олимпијада

Иако сe уште не беше формално ре­ги­стрирано здружението, г. Стаматовски и неговите соработници спроведоа неколку активности во текот на минатата година:  една пинг-понг екипа составена од деца учествуваше на Балканското првенство на Специјалната олимпијада во Бања Лука, а во април 2002-та, македонската фудбалска екипа го освои третото место на Специјалната олимпијада на три континенти, што се одржа во Атина. Се подготвува учество на го­динешниве Олимписки игри, од 20 до 29 јуни, каде Специјалната олимпијада - Македонија ќе има неколку свои нат­пре­варувачки екипи.

- Овие успеси, но и самото учество е голем стимул за лицата со ментален хендикеп. За нас е најважно да ги мотивираме и децата и родителите, да ги привлечеме и оние кои не се во институциите. За жал, многу од нив се повлечени и речиси “скриени”, а ние сакаме да ги охрабриме, да ги вклучиме во општес­твените текови. Истовремено, важно е да се делува на јавноста за нивно што пошироко прифаќање и да се надминуваат пред­расудите - вели г. Стаматоски.

М. Иванова