Q&A
Дали НВО можат да се ослободат од царинските обврски?
Веќе подолго време, меѓу невладините организации се дебатира за проблемот на царинските обврски што ги имаат НВО, како и за можноста да бидат ослободени од нив, со оглед дека вршат активности од јавен интерес. Токму ова прашање - кои се главните видови царински обврски на НВО и дали постои можност за ослободување од истите, им го поставивме на надлежните од Министерството за финансии.
На ова прашање одговара г-ѓа Ленка Петковска од Секторот за царина при Министерството за финансии: „Секоја стока што се увезува во Република Македонија подлежи на плаќање царина според стапките определени во Царинската тарифа, доколку со Царинскиот закон не е поинаку определено. Ослободувањата од плаќање царина опфатени се во членовите од 180 до 184 од Царинскиот закон. Во овие членови регулирано е ослободувањето од плаќање царина на странските лица (дипломатски и конзуларни претставништва, како и претставниците на нивниот персонал), ослободување на правни лица и ослободување на државните органи, односно корисниците единки на буџетот на Република Македонија. Ослободувањето на правните лица е регулирано во членот 182, при што од плаќање царина се ослоободува стоката што ја увезува Црвениот крст на Република Македонија и други регистрирани хуманитарни и добротворни организации во Република Македонија, и тоа за:
а) стоки што служат за намирување (задоволување) на основните животни потреби на лицата на кои им е потребна помош, под услов да се увезуваат заради бесплатно доделување;
б) стоки кои бесплатно им ги доставува странски лице или организација, која не е наменета за препродажба или вршење друга доходовна дејност и служи исклучиво за бесплатно доделување на лица на кои им е потребна помош;
ц) опрема која бесплатно им ја доставува странско лице или странска организација која не е наменета за препродажба или вршење друга доходовна дејност и служи исклучиво заради доделување на нивните животни потреби.
Под стоки за намирување на основните животни потреби се подразбира стока која е потребна за задоволување на основните човечки потреби, на пример прехранбени производи, облека, постелнина, шатори и контејнери за живеење. Овие ослободувања не се однесуваат на алкохолот и пијалаците кои содржат алкохол, тутунот и производите од тутун, кафето и оригиналниот чај и моторните возила. Исто така, од плаќање царина се ослободени противпожарните организации и други спасувачки служби, при што ослободувањето од плаќање царина се однесува само на стоката која е утврдена со мерките за организирање и опремување на силите на заштита, спасување и помош. Како спасувачки служби се сметаат цивилната заштита и јавните служби за заштита, спасување и помош, освен противпожарните служби. Ова ослободување се однесува исто така кога се увезуваат предмети кои непосредно се наменети за вршење културна дејност и кои не се произведуваат во РМ, и предмети кои се наменети за непосредно вршење социјална и образовна дејност.“
Ленка Петковска, Министерство за финансии на Република Македонија
|